أبرز تصريحات محمد وهبي قبل مواجهة هايتي

خرج مدرب المنتخب الوطني محمد وهبي بتصريحات قوية ومهمة بزاف بخصوص الجاهزية ديال الفرقة والستراتيجية لي غادي يلعب بها في الماتشات الجايين ديال كأس العالم 2026. الكوتش وهبي طمأن الجماهير المغربية وأكد بلي اللعابة كاملين في فورمة ناضية وجاهزين بدنيًا بنسبة 100%. وأوضح بلي واخا عندو تصور أولي على التشكيلة الأساسية لي غايبدا بها، إلا أنه باقي ما حسمهاش بشكل نهائي وغادي يتسنى حتى لآخر لحظة قبل الماتش باش ياخد القرار الأنسب لي غايمشي مع طبيعة الخصم وطريقة اللعب ديالو.

وفي نفس السياق، أكد وهبي بلي الطموح الوحيد ديال المنتخب هو يربح هاد المقابلة ويسالي دور المجموعات وهوما في الصدارة، حيت الدخول لأي ماتش بلا طموح ديال الفوز تيرجع الوجود ديال الفرقة بلا معنى. ووضح الكوتش بلي ما كاينين حتى أسماء جديدة غاتدخل على الجروب، وغادي يعتمد بشكل كامل على الـ 26 لعيب لي كاينين في اللائحة الرسمية حيت معروفين عند كلشي وتيق في القدرات ديالهم باش يمشيو بعيد في هاد البطولة.

وبخصوص تسيير المجموعة وتدوير اللعابة ، ركّز المدرب على أن الطاقم التقني تيعتمد على دقة التوازن على حساب الجاهزية والخصم، وطمأن اللعابة لي ما تيلعبوش بزاف بحال جسيم وغيرو بلي عدم المشاركة ما تيعنيش الاستبعاد، وإنما هو قرار تيرتبط غير بالسير ديال اللقاء. وأضاف بلي الفرقة باقي في المراحل الأولى من المنافسة وكاين الوقت الكافي فين ياخد كلشي الفرصة ديالو، واللعابة لي ما بانوش دابا غيكون عندهم دور حاسم في الوقت المناسب حيت كاع العناصر مهمة ولي غايب اليوم يقدر يكون أساسي الماتش الجاي.

أما من الجانب الذهني والنفسي، وهبي ركز على أن المشاركة في كاس العالم بحد ذاتها ت تمثل دافع وحافز كبير بزاف وسط المجموعة، والحماس واضح عند كاع الدراري لي باغيين يعطيوا كل ما عندهم. وفي الأخير، تكلّم الكوتش على الحكم الهولندي لي غايدير الماتش وطمأن الجمهور بلي ما كاينش لاش نقلقو، حيت هو حكم ديال الفيفا وتيتمتع باحترافية وخبرة كبيرة، وتيدير الماتشات بحيادية كاملة وما غايكونوا حتى مشاكل في التحكيم.