28 mai 2026, 22:18:22
علاش مدرب أجنبي ملي المغاربة ربحونا الكان؟
الإقصاء ديال المنتخب المغربي لأقل من 17 سنة من نصف نهائي كأس إفريقيا رجع يفتح النقاش من جديد حول أهمية الثقة فالأطر الوطنية، خصوصاً بعد السنوات الأخيرة اللي عرفات نجاحات كبيرة مع المدربين المغاربة فالفئات السنية.
هاد المنتخب دخل البطولة وهو حامل اللقب، لكن الأداء هاد المرة ما كانش مقنع بزاف، لا من ناحية الهوية، لا التنظيم، ولا الروح الجماعية اللي تعودنا نشوفوها فالأشبال. الاعتماد كان كبير على المهارات الفردية، بينما المنتخب بان مرات كثيرة بلا حلول واضحة داخل الملعب.
المثير أن المغرب وصل لنهائي الكان مرتين متتاليتين وربح اللقب مع أطر وطنية مغربية، والمنتخب كان عندو شخصية واضحة، ضغط عالي، انسجام، وقتالية وروح جماعية كبيرة.
اليوم، بزاف ديال الجماهير بدات كتطرح السؤال: علاش نغامرو بمدربين أجانب فالفئات السنية، والمغاربة أصلاً سبق ليهم نجحو وحققو نتائج كبيرة؟
أكيد ماشي أي إخفاق يعني نهاية المشروع، لكن اللي وقع كيبين أن الاستمرارية والثقة فالمدرسة المغربية ممكن تكون مهمة بزاف، خصوصاً وأن المواهب موجودة، والخصاص ماشي فاللاعبين بقدر ما هو فالهوية وطريقة الاشتغال.
شنو رأيكم.. واش فعلاً المدرب المغربي هو الأنسب للفئات السنية؟
Loading related news...
